Гердлэн вордскем нуналаз

Толон Кузебай Гердлэн синпелетэз азьын удмуртъёс дано тодосчилэсь, кылбурчилэсь, этнографлэсь  117 арессэ пусйыны люкаськизы. 

Куинетӥ арзэ ни ми Гердлэн вордскем нуналэз сярысь гожтӥськом. Кылем но валлян аръёсы гожъямъёсынымы асьтэос но тодматскыны быгатӥськоды. Озьы ик куинь ар ӵоже Герд дорын пумиськылонъёслэсь пӧртэмлыксэс ӵошатыны луонлыкты вань. 

Табере вакчияк толло пумиськон сярысь. 

Оло куазь удалтэмен, оло Герд доры бичаськыны дышемъёслы луыса, туэ Герд дорын калыкез трос ик вал. Пӧлазы егитъёс но, мӧйыос но. 

Нош пумиськонэз мытэмъёсын Кузебай Герд нимо гимназиысь дышетӥсьёсты но дышетскисьёсты шуыны луэ, дыр. Дышетӥсьёс ик пумиськонэз кутскизы но. Шумпотыса ик пусйиськом, кутскизы но, нуизы но удмурт кылын. Собере пиналъёс Гердлэсь кылбуръёссэ лыдӟизы но синпелет вӧзы сяськаос понӥзы. 

Озьы ик вераськиз тодмо удмурт гожъяськись Вячеслав Ар-Серги, аслэсьтыз кылбурзэ лыдӟиз Богдан Анфиногенов. Удмурт кылосбуръя факультетын дышетӥсь Светлана Арекеева Герд доры параысьтыз студентъёссэ вайыса ик вуылӥз. Светлана Тимофеевна вераськиз Гердлэн кылбурчи сяна зол тодосчи луэмез сярысь. Али солэсь ужъёссэ лыдӟе ке, пе, ас понназ малпа, Гердлэн куд-ог малпанъёсыз та дырлы улонэ пыӵазы, вуизы ни, ура! Кылсярысь, Ижкарын финн кылэз дышетыны луонлык сярысь Гердлэн малпанэз улонэ пыӵаз, удмурт кылосбуръя факультетын сое кӧня ар ӵоже дышето ни. Нош куд-ог мукет малпанъёсыз гожъямъёсаз гинэ кылемын. Озьы ик вераськиз Евгения Сундукова, со но тросэзлы тодмо удмурт кылосбуръя факультетын ог дыре ужаменыз. Евгения Александровна шуиз, азьло аръёсы Гердэз удмуртъёсты сайканы, ӝутскыны курись кылбуръёсыз понна пуктӥзы но виизы, нош Богдан Анфиногенов али сыӵегес ик пуштросо кылбуръёсызъя «Супер удмурты» кырӟанзэ Муско Кремльын быдэстэ. Малпаськытӥсь ӵошатон. 

Берло вуиз на Сергей Бехтерев. Берло дыре сое но солэсь лэчыт гожъямъёссэ «ВКонтактеысь» адӟисьтэмъёс ӧвӧл, дыр. Со но лыдӟиз Гердлэсь кылбурзэ. Рос-прос. Зол куараен. Со куараез синпелет вӧзысь музейлэн борддоръёсаз йыгаськыса берен Герд пала вуылӥз кадь... Озьы йылпумъяськиз пумиськон... 

Ваньзы кошкем бере, ог-вить мурт Герд доры кылиз на вал, соку ик отчы Андрей Гоголев вуиз. Берло дыре та кылбурчи трос Гердэн но солэн улонэныз тунсыкъяське но лекциос лыдӟе. Андрей озьы ик Гердлы сӥзем кылбурзэ лыдӟиз. Люкиськыку ни, со ик Гердлэн кулон арез сярысь куинь пӧртэм малпанъёсты шараяз. Верамез бере пушказ ӝуась сюсьтылэн сылӥсь пияла тарс! карыса ик пилиськиз... 


Андрей Гоголев


Богдан Анфиногенов, Гриша Григорьев, Сергей Бехтерев


Гердэн астуспуктэм

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын