Султыны но потыны литературае

Толон "Инвожо" журналлэн валтӥсь редакторез но Гожъяськисьёслэн огазеяськонзылэн кивалтӥсез Пётр Захаров дораз егит гожъяськисьёсты ӧтьылӥз но удмурт литература сярысь вераськон ӝутӥз. "Ваньмон дыр" кылзысал но кылзысал, дыр, Пётр Михайловичез, угось туала арын удмурт литература сярысь егитъёс урокъёсын но удмурт кылосбуръя факультетын гинэ кыло, дыр. Ми гожтыса кельтӥм кӧнязэ ке визьмо малпанъёсты но лыдӟисьёсмылы соосын тодматскыны дэмласьком. 

Удмурт гожъяськисьёслэн огазеяськоназы сю пала членъёс, кудъёсыз асьсэды писательёс шуо... нош гожъяськисьёс  ӧвӧл. 
 

Берло дыре удмуртъёс пӧлын зэмос литература уг лэсьтӥськы. 
 

Удмурт кыл быроз, асьме литература ке ӧз луы. 
 

Литература – со одӥгез эмъюм, кудӥз калыкъёсты али возе. 
 

Удмурт кылын  литература ӧвӧл ке, адямилэн ноку но удмурт кылын вераськемез уз поты. 
 

Удмуртъёс ӟуч литератураез золгес ке ярато, озьыен, ӟуч кылын литература золгес гожтэмын. Нош удмурт кылын литератураез уг ке лыдӟо, озьыен, со ляб.
 

Кинъёс кылдытозы удмурт литератураез, егитъёс ке со борды ӧз басьтӥське? 
 

Учконо ке соосты, кин кылдытӥз удмурт литератураез, соос ваньзы егитэсь вал. Туннэ, мар соос гожтӥзы, сое классикаен лыдъяло. 
 

Учконо ке Кузебай Гердлэсь, Кедра Митрейлэсь, Михаил Коноваловлэсь, Игнатий Гавриловлэсь кылзэс, со куаж-куаж удмурт кыл. Туж образной кыл. Отын бадӟым метафораос адӟисько. 
 

Басьтоно ке со ик Кедра Митреез, со ваньзэ нырысетӥ гожтӥз. Нырысетӥ кылбур, нырысетӥ трагедия, нырысетӥ автоповесть. Нош малы али ми, егитъёс, ум быгатӥське меда озьы ик гожтыны? Султыны но потыны литературае. 
 

Мыным потэ, тужгес но бадӟым ужпум  - асьмеос куспамы туж ӧжыт литература сярысь вераськиськом. Оглом творчество сярысь. Кызьы со луыны кулэ. Кружокъёсмы ӧвӧл. 
 

Туннэ вань интернет, со пыр ваньзэ адӟыны луэ. Нош азьло выль малпанъёс литератураын гожтӥсько вал. Соин вань адямиос литература сярысь верасько вал. 
 

Мынам потэ кылдытэм матысь круг, кудӥз каллен-каллен удмурт литератураез лэсьтыны кутскысал. Люкаськысалмы, лыдӟысалмы произведениосты, вераськысалмы соос сярысь, критика сётысалмы. Цех кадь ужасалмы. 
 

Произведение огшоры гинэ ке гожтӥськиз, критика шоры, куронъёс шоры учкытэк, со улонэ уз пыӵа. 
 

Мон лыдӟисько тӥлесьтыд кылбуръёстэс но туж трос янгышъёстэс адӟисько. Куд-огзэ кылбуръёсты али ик быдтыса куштӥд ке но, номыр уз луы. Нош куд-огез борды пичи гинэ киез йӧттоно, соку со умой пӧрмоз. Тӥляд вань мылкыдды, сюлмаськонъёсты, но вераськыны дырды ӧвӧл. 
 

Литература удыс нокинлы кулэтэм луэменыз аналтэмын ӧвӧл, со литературной процессъёс ӧвӧлэн куштэмын. Удмуртиын литературной процессъёс луысалзы ке, асьмеос ваньзэ вормыны быгатысалмы. 
 

Татарстанын Гожъяськисьёслэн огазеяськонзылы котькуд ар 50 миллион манет сёто, соин ик отын арлы быдэ котькуд гожъяськисьлэн книгаез потэ. Асьме Гожъяськисьёслэн огазеяськонзылы арлы 400 сюрс манет пала сёто. Бигеръёслэн со лыдпуссы будэ ке, асьмелы туэ коньдон ӧз ик сётэ. Мон понна со бадӟым ужпум ӧвӧл. Асьмеос коньдон но шедьтыны быгатӥськом, но ужпуммы мукетаз - ӧвӧл ачиз литература.
 

Асьмелэн ужпумъёсмы: одӥг ласянь - удмурт литератураез ӝутон, мукет ласянь - асьмеды та улонын кызьы ке но кужмо, куараё карон. Али асьме куарамы Удмурт Элькунын ӧвӧл. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын