Тунаськон

туспуктӥз Кати Сысоева 

Кылан-буранэз тодӥсь Николай Анисимов вера, кыӵе йылол сярысь со тодӥз Кияса ёросысь Тӥгырмен гуртысь: 

"Удмурт егитъёслэн тужгес но паськыт вӧлмем но тунсыко вал огез «шимес» тунаськонзы. Акшан вакытэ яке уйшоре (та вакытэ, калыклэн оскемезъя, тужгес вӧлмыса кузёясько вал пӧртэм сопал лулъёс) егитъёс мыно вал сюрес воже, мунчое, кеносэ, буш юртэ, гулбече, шур доры, коргидэ но мукет интыосы. Таӵе шимес интыосын гинэ луэ вал сопал лулъёсын кусып тупатыны, но тодыны аслад юанэдлы валэктон. Сыӵе кусыпъёс дыръя чакласькыны косо вал, угось урод, валантэм кужымъёсын герӟаськоно. Со понна тыршизы пӧртэм ужрадъёсын но арбериосын асьсэды утьыны: сюрес вожын асьсэ котыртӥ котрет лэсьтӥзы корт арбериосын (кусоен, тӥрен, пуртэн, качыен, кортӵоген), выл дӥсьсэс мыддорин дӥсязы, мыдлань мае ке быдэстӥзы (сьӧрлань яке берлань быдэстӥзы мае ке) но мукет. Сюрес вожын выдыса кылзиськизы, кин мар кылоз: гырлы яке вал гырдаллям кураос – сюанлы, гудӥськем, кокаськем яке куака кесяськем куараос – кулонлы но мукет. Сюрес вожын ик лымы вылэ пуксьыса, сьӧрлань кариськыса, берысьтызы лымы кырмыса басьто но учко, кыӵе гон сюриз: тӧдьы-а, горд-а, куӵо-а? Кыӵе гон сюриз, сыӵе йырсиё муртлы ик бызёд. Мунчо ӝопые гольык кизэс донгазы: ки бордазы гольык ки кутскиз ке, кузпалзы яке азьпал улонзы куанер луоз, нош гоно ки кутӥз ке, бай улон вите. Уйшоре ошмесысь ву вайыса, со вуэз пуньые омыртыса кыре кынтыны кельто. Ӵукна чакласько кыӵе со кынмиз: ӵошкыт-а яке вырйыло-а. Вырйыло ке, кӧто луыса бызёд. Гулбече пырыса, пазьылэсэ пень поно, со вылэ стаканэн ву поныса учко: кыӵе тус потоз. Кыӵе тус потоз, сыӵе тусо ик кузпалыд луоз. Кенос сергы кариськоно но кылзиськоно, кыӵе куара кылод. Ю-тысь кисьтэм куара – бай улонлы, куръяськем куара – куанер улонлы."

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын