"Пузкарлэн" нырысетӥ возьматонэз

Толон "Роликс" киновозьматонниын выль удмурт "Пузкар" кинолэн нырысетӥ возьматонэз ортчиз. Возьматонысь но пресс-конференциысь туспуктэмъёсты улӥысь адӟыны быгатӥськоды. 

Вакчияк фильм сярысь: "Пузкар" - удмурт-поляк Inwis kinopottonni-лэн кыкетӥез фильмез. Со бордын ужан 2012-тӥ арын кутскиз но 1,5 ар кыстӥськиз. Кинолэн продюссерез - Петыр Палган, операторез - Рафал Челек, куарая операторез - Пшемек Дзенгел. Ваньзы ик соос Польшаысь. Кинолы сценарий тодмо удмурт журналист, гожъяськись Дарали Лели гожтӥз. "Пузкар"-лэн кык кинопуктӥсез - со Удмурт театрысь артистъёс Сергей Наговицын но Константин Ложкин. 

"Роликс" киновозьматонние вуэмъёслэсь ӧтён билетъёссэс удмурт нылаш эскериз. 

Кино учкон залэ пырон азьын удмурт MADEMOISELLE OUDMOURTE модали агенствоысь кык чеберайёс вань учкисьёсты пумитазы но мыняса удмурт кылын ӟечбуръяськылӥзы. 

Векчи, ӝужыт пыдберо туфлиос вылын сылӥсь но мынясь нылашъёс аслобетъёсын лобась нылъёслы укшазы. 

Залын киноез лэсьтӥсьёс, юрттӥськисьёс, журналистъёс, дышетӥсьёс, тодосчиос но олокинъёс пуко ни вал. 

Киноез учкон азьын продюссер но кинопуктӥсьёс кӧня ке вераськизы. 

Кинопуктӥсьёс Константин Ложкин но Сергей Наговицын - Щепкин нимо театр училищеез йылпумъямъёс, Удмурт кун театрысь артистъёс. 

Удмурт министръёс - Лариса Буранова но Владимир Соловьёв - кино бордын ужасьёслы тау каризы. 

Кино бере учкисьёс кык малпанэн потӥзы кадь: 
1. Мыным ваньмыз кельшиз. 
2. Мон кинолэсь пумзэ ӧй вала. 

Киноез учкем бере пресс-конференция ортчиз. Татчы но туж трос калык люкаськиз. 

Калык туж кема пуксьыны выриз но укыр зол ӵашетӥз, нош кино бордын ужасьёслэн пресс-конференциын микрофонъёссы ӧй вал... 

Но оло со умой но. Малы ке шуоно тросэз люкаськемъёс яке серем, яке мар ке юан понна гинэ юанъёс сётъязы. Кылсярысь, малы, пе, киноын сомында аракы юо? 

Тунсыко вал кылзыны Удмурт Элькунысь калык артистлэсь Леонид Романовлэсь кинолы дунъетсэ. Со пусйиз, шудӥсь муртъёслэн ымныразы, синъёсазы буш ке, киноын со ваньмыз туж умой адӟиське. 

Пресс-конференция бере туспуксёнъёс кутскизы. 

Ксюша Ворончихина киноын валтӥсь ролез шудӥз. 

Поляк эшъёсмытэк "Пузкар" ӧй но луысал, дыр. Тау соослы! 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын