Мон кылбурай

13-тӥ тулыспалэ 16:00 часын Эшъяськон юртын "Мон кылбурай" бичетлэн презентациез ортчоз. 

Бичетэ "Шундыкар-2013" лагерьысь "Литература" отрядысь пиналъёслэн ужъёссы люкамын. Кылем арын та отрядын кылбуран амалъёсын но кылысь кылэ берыктон ужен куать пинал тодматскиз. Нош дышетӥз соосты Удмурт театрысь артист но кылбурчи Алексей Котков. 

Та егит кылбурчиослэн ужъёссы "Мон кылбурай" бичетэ пыризы

"Мон кылбурай" бичетэз Алексей Котков но Удмурт егитъёслэн "Шунды" огазеяськонзылэн тӧроез Ольга Тронина дасязы. Пиналъёслэн кылбуръёссы борды суредъёс Удмурт театрысь артистка Марина Самсонова кылдытӥз. 

Бичетлэн тиражез - 60 экземпляр. Кызьы ивортӥз О.Тронина, книгалэн кулэлыкез бадӟым луиз ке, тиражзэ йылтыны луоз. 

"Мон кылбурай" бичетэ пырем куд-ог кылбуръёсын али ик тодматскемды луэ. 

Ирина Снигирева 

Мон – коньдон!
Шат луоз монтэк улон?
Уждунэз монэн сёто,
Оломар монэн басьто –
Мон уксё!

Мон уксё!
Калыкъёс монэн висё.
Банкъёсын монэ возё,
Собере шедьто кузё.

Байёсыз нош монэ малы ке
Куреглы киськало, мон трос ке. 

Марина Пахомова 

Мон – пичильтык пыдчиньы,
Трос пыдъёсын улӥсько.
Дас агайёс но вынъёс –
Ми мугорез возиськом.
Мон – кышкасьтэм пыдчиньы!
Мон – зол!
Вань, бен, одӥг тушмонэ –
Мозоль!
Мон кужмо, мон герой, усточи…
Горд лакен буяськем Чеберина.
Пачкатӥсь туфлитэк ке ветлэ,
Одӥгез кузёе – Марина. 

Карина Кочанова 

Мон – помада,
Гордалэс помада.
Улӥсько Аннок дорын,
Со али шуныт душын.
Алигес гинэ сайказ –
Толон туж берозь поръяз.
Анямы льӧль ымдураз
Монэ таш-таш зол зыра!
Тӥнь! Али но матэктэ,
Чупаны монэ турттэ.
Кукъёсы ке луысал,
Тэтчаса ик пегӟысал…

Мар бен кин сизьым аресаз
Макияж лэсьтэ ымдураз? 

Влад Кабанов 

Мон – ческыт перепеч,
Не шаньга и не кӧмеч.
Пӧсь гурын пыжемын, яратса вӧямын –
Кыллисько ни табре ӝӧк шорын.
Куртчыло ни монэ сопалась-тапалась…
Ой, ческыт вылӥськем –
Мон асме
Кык-куинь пол куртчытэк ӧйлась. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын