Настя Тутаева

Анастасия Тутаева


В
ордӥськи Дебес ёросысь Заречная Медла гуртын.

Мон уг быгатӥськы асме кылбурчиен лыдъяны. Малы ке шуоно зэмос кылбурчи аслаз чуръёсыныз шоканы кулэ, нош мынам озьы ӧвӧл. Кылбуръёсы вордӥсько ке но, со туж шер луэ. Но ӵемысь бер уйин. Куке йыре "шузи" малпанъёс лыктыны кутско.

Кылбуран мылкыд лыктыны быгатэ пӧртэм сямен: секыт мылкыд дыръя, мур малпаськыса яке огшоры урам кузя ветлыса. Вань кылбурчиос пӧлысь тужгес но кельшо Ашальчи Оки, Анна Ахматова,  А.Твардовский но солэн ож сярысь кылбуръёсыз.

 

Дэбес музъеме

Кин ке понна огшоры гинэ,
Нош со мыным мусо потэ.
Кин ке сьӧд бус гинэ адӟе,
Нош мон понна шунды пиштэ.
Экто отын вож кызьпуос,
Тулкымъясько паськыт лудъёс,
Нош тюрагай кырӟан малпа,
Чупчи шурлы сое кузьма.

Припев: Дэбес музъеме,
Туж мусо, тон, мыным потӥськод!
Азвесь чыртывесь гадь вылад
Кемалась нуллӥськод.
Дэбесэ, тынэсьтыд мӧзмисько!
Дэбесэ мон сюлмысь дыртӥсько!
Дэбесэ! Мон тонэ данъясько!

Кытчы мед-а улон нуоз?
Кӧня музъем на усьтылоз?
Уз лу отын ни Байгурезь,
Кузьыт потоз коньыт эмезь.
Иськемъёс кылёзы бере,
Ӝоген вуо ини гуртэ.
Трос сюресъёс ваё доре,
Мӧзме сюлэм - анай вите.

Припев: Дэбес музъеме,
Туж мусо тон мыным потӥськод!
Азвесь чыртывесь гадь вылад
Кемалась нуллӥськод.
Дэбесэ, тынэсьтыд мӧзмисько!
Дэбесэ мон сюлмысь дыртӥсько!
Дэбесэ! Мон тонэ данъясько!

тулыс, 2011

 

 

*** 
Уйлы пумит вамыштыса,
Нош кытчы ке тон дыртӥськод.
Анаеныд керетыса,
Ымдуръёстэ горд буяськод.
Сьӧд синъёсыд лекен учко 
Андан кадь зол атай шоры.
- Мон кошкисько! - вазьылӥськод.
- Нош тон кытчы?
- Мон шудыны!
Уйлы пумит вамыштыса,
Ӝомыт куазен ӟыгырскиськод...

Пинал дырез азьпалтыса,
Кытысь шуддэ меда шедьтод?

2012 ар

 


***
Аракыен уд буйгаты куректонэз,
Уз юртты со вунэтыны шуг-секытэз
Адямилэсь со мылкыдзэ ке но ӝутэ,
Пӧртэм эзель ӟезьы дораз вуттэ.
Зынме йырсазь аракыен... эке.

2011-2012 аръёс

 


***
Адямилэн туж трос ни сьӧлыкез,
Соин, дыр, Инмарлэн
Пӧзе ни йыркурез.
Писпуез ӵашйыттозь.
Тылпуэн ӝуаттозь.
Арняен, толэзен
Уй-нунал зорыттозь.

Нош адями эшшо сьӧлыкалоз!
Со Инмарлэн но ымныраз
Сяльӟын вуоз.
Эшъёссэ виыттозь.
Лушкаса пегӟыттозь.
Саптаськем сюлэмзэ
Инмарлы кузьматтозь!

пӧсьтолэзь, 2012 ар

 

Кезьыт синвуоссэ кисьтэ инкуазь

Кезьыт синвуоссэ кисьтэ инкуазь.
Бӧрдэ... Курекъяське...
Кин ке дэри киын
Йӧтскем, лэся, сюлмаз,
Синкылиен куректонзэ гылтэ.
Зоре... Зоре... Гудыръяське...
Пуке укно дораз...
Льӧмпу садын сяськаяське –

 тулыс, нош со огназ.

оштолэзь, 2012 ар

 


До дури...

Лымынылэн ӵошатӥськод.
"Снегурочка, люблю тебя до дури,
Пылинки бы сдувал в мороз и в бури," - 
Озьы ке но астэ ачид тон пӧяськод.

Лымынылэн ӵошатӥськод до дури.
Синвуосме ӵушылтӥськод - медаз йӧ кура.
Жингыртысал тыныд в мороз и в бури...

Снегурочка снеговиклы пӧрмоз, дыр, юри...
Милям тонэн котьку ваньмыз до дури.

10.02.2013 

 


***
Яратыса.
Нуныяса.
Чупаса.
Нылпиез сямен.
Луысал ке...

Пеймытэн.
Югытэн.
Омыртэк.
Омырен.
Ваче син кыльыса,
Ӵукнаез но ӝытэз
Тонэныд шокасал.

10.02.2013

 

***

Урамтӥ васькисько,
Дэриез коласа,
Оштолэзь нуналлэсь 
Ужъёссэ чакласа.
Лулпушме нош сьӧд кый 
Кекатэ марлы ке..
Тол пумит мынӥсько - 
Йырсазе сураське.
"Мар-о меда луиз?" - 
Ас поннам малпасько.
"Мӧзмиськод, шат... Кинлэсь?" - 
Сюлмылэсь юасько.
Урамтӥ васькисько,
Дэриез коласа,
Зор вуэн мылкыдме 
Уката пожаса.
Тулыслэсь вуэмзэ
Чик ӧй шӧды туннэ
Гажано синъёстэ
Мон ӧй шедьты, эше...

оштолэзь, 2011 ар

 


Шузи чуръёс

Уг пыжиськы табань, шаньга, мильым,
Коньыт чаям но сылалэз быдэс кырым.
Мон батарейказэ ӧй вошты часысьтым:
Выль дуннее чырса - 
Тӧдьы губи сисьме ни пакетын.

Ӟардон азьын мед чирдозы вал уӵыос...
Гажан эше но кузьмасал ке сяськаос...
Сураськисько. Уйбыртӥсько шузи чуръёс.
Уйшор бере мынам сюлмаськонэ
Луэ визьтэммытозь.

Льӧмпу сямен нылмурт но сяськая куддыр,
Котыр утчаськисько. Ой, Кылчинэ, вуоз-а сыӵе дыр?
Туннэ мон ваче син гольык малпанэным.
Мон батарейказэ ӧй вошты часысьтым,
Соин, дыр, дуннее минтай кадь кынмемын.

22.02.2013 

 

 

 Ведӥн

Мон табере уг ни кулы уйин.
Берто. Эн кышка дас кыке
Дорад вуиз ке сьӧд ведӥн.
Урам кузя,
Балконысен,
Автобусын
Шедьто тонэ.
Виё.
Чик жалятэк кекатӥсько синъёсыным.

Мон инбамын ке но,
Бордад луо уйин.
Тон вить монэ.
Эн ворсаськы.
...Ведӥн.

22 оштолэзь, 2013 ар

 

Япон кылбуръёсты лыдӟыса

                           Песянаелы

Кошкид, угось, укыр кыдёке.
Тодам возьыса но, ноку уг веръя ни
Зыретэн табаньдэ!

 

***

Йӧ кураз льӧмпу сяськаез.
Кылисько нош огнам.
Юнме вылэм куартолэзь.

*** 

 

Мон критик ӧвӧл.
Берпуметӥ кыл тон сьӧрын.
Сантэма. Бышкалты. Чидало.
Выльысь вордӥсько.
Улэме потэ.

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын