Пуроысь рэппер

 Лёша Пикулев яке ПШNR - Пуроысь удмурт рэп быдэстӥсь, Bereket группаын кырӟась но  Удмурт кун университетысь удмурт филологи факультетын дышетскись. Толло нуналысен тросэзлы тодмо "Valasa" нимо рэпезъя но соя пуктэм клипъя. "Ваньмон дыр" тодматскиз удмурт рэпперен. 



- Олёш, малы тон астэ ПШNR нимаськод?

- ПШNR - со глассной букваостэк гожтэм ПУШНЕР. 2009-2010-тӥ аръёсы Герман Волковен рэп гожъяны кутскыкумы, Пушнер но Исьнер кушем нимъёс малпамы вал. Асьмеос но ум тодӥське, малы одно таӵе кылъёсты бырйимы. Но соос удмурт кылын. Чузъяськемзыя но ог-огзылы матын луо. 

- 2009-тӥ аръёсы рэп гожъяны кутскид ни! Нош кинлэсь адӟем карылӥд?

- Рэп гожъяны 9-тӥ классысен кутски ни вал, но соку со огшоры вал. Ӵемысь улонлэн шонертэм луэмез сярысь. Али азьло ужъёсме учкисько ке, куддыр тунсыко, могдос потэ. 
Азьло кунгож сьӧрысь репперъёсты гинэ кылзӥсько вал, кылсярысь, 50 cent, Eminem, Fabolous. Нош али ӟучъёссэ гинэ - Oxxxymiron, H1GH. Соослэсь ик дышетскисько но. Котькуд рэпперлэн аслаз стилез луыны кулэ, аслаз лыдӟон манерез. Мыным та бордын ужано на.

- Кызьы рэп гожъяськод? Кытысь кулэ кылъёс но темаос шедьтӥськод?

- Кылъёс дорам шуак лыкто. Шуом, туннэ выль трек гожтоно, солы кылъёс малпано ке, озьы ноку умой уг пӧрмы! Со толыктэм дыр быдтон! Чылкак кылбур гожтон кадь ик, но рэп крезьгурен но битэн герӟаськемын на.  

-  Тонэ нырысетӥ удмурт рэппер ниманы луэ-а? 

-  Асме ачим озьы шуыны быгатӥсько. Озьы ик Герман Волковез, кудӥз Исьнер. Мукет удмурт рэпперъёсты тодам уг вайиськы. Вань сыӵеос, кин кутске: «А, давай мон но удмурт рэп гожтыны оскалто ай. Тунсыко ук! Табань-шаньга-перепеч…» Озьы уж уз мыны. Рэпен выремед потэ ке, рос-прос та борды кутсконо, берло куштоно ӧвӧл. Одно ик мукет рэпперъёсты кылзоно но ялан малы ке дышетсконо. 

-  Мар анай-атаед шуо рэпер луэмед сярысь? Тон мукет сямен дӥсяськиськод но, со понна уг тышкасько-а?

- Анай-атай номыр уг шуо. Гуртысь огез бадӟым бӧлетэ гужем куспын студилы пӧрмиз ни. Та ужме мон куштыны уг малпаськы, котькин котьма мед шуоз. Дӥсяськисько озьы, кызьы аслым кельше. Мода мыным кулэ ӧвӧл. Эшъёс но, анай-атай но, гурт калык но дышемын ни. 

-  Кин "Valasa" нимо рэпедъя клиптэ пуктӥз? Кин малпаз? 

- Пуктӥм Волков Германэн (Is'Nr) ӵош. Мон солы клип пумысен малпанме верай но, со соку ик юрттӥськыны соглаш луиз. Со ик валтӥсь оператор вал. Бадӟым тау солы!  

-  Азьланяз но клипъёс пуктоды на? 

- Азьланяз одно ик клипъёс луозы на. Тани малпаськом вордӥськем Пуро гуртмы сярысь но мар ке пуктыны. Умойгес камера луысал на ке. Улом но адӟом ай, тазалык гинэ мед луоз. 

-  Тон Bereket группаын но кырӟаськод ук? Кызьы группаысь эшъёсыд учко нимаз кырӟамед но клип пуктэмед шоры?

- Пумит ӧвӧл, малпасько. Мон азьло ик огнам кырӟанъёс гожъясько вал ини. Нош Bereket кылем тулыс гинэ кылдӥз ай. Соосын но огъя клип пуктыны вуом ай. Bereket-эн ми R'n"B кырӟанъёсты быдэстӥськом, кудъёсыз эстрадалы матын. Нош ас поннам гожъям кырӟанъёсам мынам пуш малпанъёсы, кудъёссэ гожтӥсько асме но шумпоттон понна.


Bereket группа (татчы пыро: Лёша Пикулев, Ульяна Хохрякова, Алина Антонова, Лёша Софронов)

-  Клипад кулон сцена вань, кудзэ анаед адӟиз но одно ик улӟон сцена ватсаны куриз…  

- Ой, мар но ӧй вал. Олокыӵе но ченгешонъёс вал. Клипын киросъёсын сцена вань на. Со понна ми юри киросъёс лэсьтӥм, шайвылэ уд ветлы ук. Клипмес пуктэммы бере, анае киросъёсты сутэм. Малпасько, ӝоген ми клип сярысь клип поттом. Соку адӟоды, мар но ӧй вал. Со клипезлэсь устогес пӧрмоз, дыр.

-  Малы рэп одно удмурт кылын гожъяськод? 

- Мон ӟучен но эскери вал ини, но удмурт – сюлэмлы матынгес кыл, капчигес. Удмуртэн гожъясьёс но ӧжыт. Кулэ азьланьтыны. 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын